Blog‎ > ‎

Ang Saya ng Summer Mo!

posted Jun 21, 2014, 11:42 PM by Daloy Kayumanggi   [ updated Jul 22, 2014, 11:24 PM ]




 

Isa akong probinsyano, lumaki sa napakagandang isla ng Palawan. Kung kaya’t ang tag-araw para sa akin ay larawan ng saya.

Kadalasan kami nuon ay bumibisita sa aming mga kamag-anak sa Maynila at Batangas. Masaya kasi nakikita mo ang lahat ng iyong mga pinsan, tito, tita, lolo at lola. Marami kang nakikitang bago, lalo nuon wala pang Jollibee sa bayan namin, walang mall. Kaya tuwing bibisita kami sa Maynila, kakaibang alaala ang nabubuo sa aking isipan. Pero kahit na may ibang pang-akit at ganda ang Maynila at Batangas, may katangi-tanging larawan sa akin ang tag-araw bilang lumaki sa isang island province.

Ano ba nirirepresenta ng tag-araw para sa iyo?

Kung babalikan ko ang aking mga alaala ng tag-araw nuon, may tatlong imaheng palaging paulit-ulit kong nakikita:

1.     Masarap itong namnamin kasama ang pamilya.

Naaala ko pa nuon, tuwing pupunta kami ng beach, maaga kaming gigising para maghanda. Si tatay ay pupunta sa palengke para mamili ng karne at isdang iihawin. Si nanay naman ay abala sa pagluto ng pansit o spaghetti, adobo o kaya naman ay menudo. Kasama pa dito ang paggawa ng egg sandwhich at pampalamig na pineapple juice bilang baon sa aming family excursion.

Kami naman ng mga kapatid ko at mga pinsan ay abala sa pagpapalobo ng salbabidang daldalhin. Kailangan dala ang goggles para hindi mahirap sumisid dahil mahapdi sa mata ang tubig alat. Ang sama-sama naming pagkilos ang nagbibigay ng ibang kulay sa panahong ito. May nabubuong excitement na malalampasan lang ng sayang mararamdaman mo kapag nagtampisaw ka na sa dagat. Dahil paulit ulit namin itong ginagawa, maraming alaala ng beach ay mga alaala rin ng pagmamahal ng aking pamilya na hinubog ng maraming taon.2.     Masarap ang walang intindihin

Pagpasok pa lamang sa beach, diretso agad sa dagat. Buong araw kaming nakababad sa tubig, sa ilalim ng matinding sikat ng araw. Lagi kaming sinasabihang mga bata na para kaming mga daing na kusang nagpapa-“tuyo” sa araw. Walang tigil na habulan, paglangoy at batuhan ng buhangin. Titigil lamang kapag nagutom na. Minsan pa nga, dala-dala na din ang sandwich sa dagat, para walang masayang na minuto.

Kaya naman, pagdating ng dapit-hapon, halos ang maputi na lamang sa aming mga mukha ay ang aming mga mata at ngipin. Sun burn kung sun burn. Ang mahalaga nuon ay magpasasa sa paglalaro sa beach. Hindi alintana ang oras na pinapalampas, ang hapdi ng balat sa pagkakasunog nito o ang pagod sa maghapong paglalaro. Minsan, madaling malimutan na kailangan natin ang ganitong mga sandali – yung isipin ang ngayon at namnamin ang kasalukuyan at ang dala nitong saya.

3.     Lilipas din ito

At gaya ng kasabihan, walang magandang bagay na hindi nagtatapos. Hudyat nuon na malapit ng matapos ang tag-araw kapag umulan na ng Mayo. Kapag nangyari na ito, kaming magpipinsan, magkakalaro, para kaming mga langgam na nawala sa linya, hindi mapakali, laging naghahanap ng ibang pupuwedeng gawin, laruin o puntahan.

At dahil mahilig din akong mag-aral nuon, ang pagwawakas ng tag-araw ay hudyat din ng panibagong simula, bagong baitang sa eskwela. Kaya’t kahit malungkot dahil hindi ka na ulit makakapag-babad sa ilalim ng araw, masaya ka rin dahil may panibago kang sisimulan, bagong bagay na pwedeng matutunan at maranasan. Lahat ng bagay, masaya man o hindi, ay lilipas din. Isa itong paalala na sa buhay, ang mga bagay na importante sa iyo ay hindi palaging andyan at ang masasayang araw ay matatapos rin.

Kakaibang Summer sa Japan

Nuong simula akong manirahan dito sa Japan sampung taon na ang nakararaan, isa sa mga unang bagay na sinabi ko sa sarili ay “goodbye summer.” Kasi nuon, ang iniisip ko walang malapit na beach sa Tokyo, na pwedeng liguan. Pwede kang pumunta ng Odaiba, pero para maamoy lang ang dagat at maglakad sa beach. Hindi pwedeng maligo.

Nalaman ko din na ang pinakamalapit na beach sa Tokyo na pwedeng liguan ay matatagpuan sa Kamakura-shi, Kanagawa. Dahil hindi din naman sya kalapitan, kasama pa ang napakahabang lakaran mula sa Kamakura station, halos katamaran mo na ang pagpunta. Sa loob ng ilang taon, hinayaan ko na lamang palipasin ang tag-araw na para bang isa itong hindi kilalang tao, nakikita mo pero hindi mo naiintindihan, hindi mo kilala.

At, dahil dito parang may isang bagay na nagsara sa aking kaloob-looban. Narealize ko na ito ay isang malaking pagkakamali sa aking attitude. Laking pasasalamat ko na sa tulong ng mga tao sa aking paligid, muling nabigyan nang kakaibang buhay ang aking tag-araw dito sa Japan.

Summer is not just the beach

Ang tag-araw ay higit pa sa pagpunta sa beach. Ito ang isang importanteng leksyon aking natutunan upang muling makita ang tatlong imaheng aking kinagisnan na sumisimbolo sa tag-araw. Imbes na palipasin ito sa pamamagitan ng pagtitiis sa isang air-conditioned room, marami kang pwedeng puntahan sa Tokyo o sa kalapit na prefecture para maging makulay na muli ang tag-araw.

Naggagandahang Parks

Maraming naggagandahang parke sa Tokyo. Isa sa aking pinakapaborito ay ang Inokashira Park sa Kichijoji. Mayroon sila ditong isang malaking lake na kung saan pwede kang mag-boating. Kapag napagod ka na sa kaka-paddle o pedal, pwede kang magpalipas ng oras sa pakikinig at pagmamasid sa iba’t ibang performer na nakakalat sa parke. Naglipana din ang iba’t ibang kainan na pwede mong tambayan.

Kung naghahanap ka naman ng mas malalaking parke, wala kang tulak-kabigin sa Showa Kinen Park sa Tachikawa o Shinrin Koen sa Saitama. And bawat isa at may mga aktibidades na pwede mong gawin. Sa Showa Kinen Park, www.showakinenpark.go.jp, pwede kang mag-BBQ kasama ang mga kaibigan mo, magbisikleta palibot ng parke, at i-enjoy ang iba’t-ibang klase ng laro.

Sa Shinrinkoen naman, www.shinrin-koen.go.jp, maaari mo ding ma-enjoy ang outdoor sa dami ng pwede mong gawin dito. Maraming palaruan para sa mga bata. At ang nakatawag pansin sa akin dito ay pwede kang magpa-reserve upang subukang sumakay sa segway bike paikot sa parke.

Leisure Pool 

Maraming leisure pools sa Japan. Mayroon in-door at outdoor pools. Isa sa in-door pools na aking nagustuhan para pagbabaran para labanan ang init ng panahon ay ang Spa Resort Hawaiians, www.hawaiians.co.jp, sa Fukushima. Nakabisita kami dito bago naganap ang triple-disaster sa Tohoku. Talaga namang na-enjoy namin ang kanilang mataas at mahabang water slides, kasama pa ang kanilang Polynesian dance shows at masarap na pagkain.

Outdoor Pool

At ang maituturing kong pinakakahawig ng pagpunta sa beach ay ang pagpunta sa Kawagoe Aquatic Park sa Saitama. 40 minuto mula sa Ikebukuro, ang water park na ito ay may iba’t ibang outdoor pools na pwede mong pagpilian. Kasama na dito ang isa kung saan pwede mong maranasan ang madaanan ng isang 2 metro na taas na alon. At ang pina-sentro ng parke na ito ay ang kanyang iba’t ibang water slides na hindi pwede para sa mga mahina ang loob. 

Sa mga napuntahan kong lugar at naranasan para gawing muling masaya ang aking tag-araw sa Japan, narealize ko na kung wala man ang pamilya mo dito sa Japan, pwede kang gumawa nang bago sa pamamagitan ng pakikihalubilo at pag-gawa ng bagong mga kaibigan. Masarap puntahan ang lahat ng lugar na ito kung may kasama kang pwedeng pagbalik-tanawan sa mga naranasan mo.

Kung mabilis man ang buhay sa Tokyo o sa iyong parte ng Japan, hindi naman kailangang araw-araw ay ito ang maging takbo ng buhay mo. Maganda ding magdahan-dahan, lasapin ang bawat experience. At sa lugar kung saan ang lahat ay mabibili na sa convenient store, hindi na halos kailangan ang mahabang preparasyon. Just do it!

At minsan, dahil ang init sa Japan tuwing tag-araw ay talaga namang parang hindi mo kakayanin, madalas nating isipin na sana ay panahon na ng taglagas. Masarap isipin pero kailangan nating pagdaanan ang bawat panahon, kung saan ang bawat isa ay may kanyang sariling dalang ganda, saya at ala-ala.

Have fun!

***

Maraming salamat sa inyong patuloy na pagtangkilik sa ating column, lalo na sa Daloy Kayumanggi. At ngayong buwang ito, ipinagdiriwang nating ang ikatlong taon ng Daloy Kayumanggi. Happy Anniversary sa ating lahat, ka-daloy! Sana ay samahan nyo kami sa mga darating pang taon.

Hanggang sa muli!

Please enable JavaScript to view the comments powered by Disqus. comments powered by Disqus
Comments