Blog‎ > ‎

Anti-Bullying Sentiment (Editorial)

posted Jun 21, 2014, 3:10 AM by Daloy Kayumanggi   [ updated Jun 21, 2014, 3:56 AM ]


Dito sa Japan, hindi na bago ang mga balita tungkol sa masamang epekto ng bullying. Minsan pa nga, sumusobra ito at nagdudulot ng epekto hindi lamang sa pamumuhay ng taong nabubully kundi sa pakikitungo niya sa kanyang pamilya at sa kanyang kapaligiran.

     

Nitong nakaraan lamang kumalat sa internet ang balita ng pagsusunog ng mga anti-China na protesters sa Vietnam. Nagsimula ang kaguluhan sa pagpapatayo ng Tsina ng oil rig, o isang istruktura na may kagamitan para maghanap ng langis, sa lugar na kasalukuyang pinag-aawayan ng dalawang bansa. Dahil dito, maraming mga pabrikang inaakalang pagmamay-ari ng mga Tsino ang sinugod, sinira at ang iba ay sinunog ng mga galit na galit na Vietnamese. Umaksyon naman agad ang gobyerno ng Tsina sa pamamagitan ng pagpapadala ng mga barko na susundo sa kanilang mga kababayan para makalikas pansamantala sa labas ng bansa.

     

Sa pangyayaring ito, nakatutok ang buong mundo sa naging aksyon ng Tsina at mga mamamayan ng Vietnam. Kinundina ng ibang bansa ang naging mapangahas na ‘eksplorasyong” ginagawa ng Tsina lalo pa at hindi pa nareresolba ang problema sa teritoryo ng dalawang bansa. Kaugnay ng mga nangyayari sa Vietnam, marahil ay hindi malayong mangyari rin ito sa Pilipinas lalo pa ay may namataang pinatayong istruktura rin ang Tsina sa Mabini Reef, isa sa mga napagkasunduang lugar noong 2002 na hindi muna gagalawin ng mga bansa sa ASEAN at Tsina.

     

Kung magpapatuloy ang ginagawang ‘eksplorasyon’ at pagsira ng Tsina sa lahat ng mga nilagdaan nilang kasunduan sa mga bansang mayroon silang teritoryal na di pagkakaunawaan, hindi malayong masundan ang anti-China sentiment sa Vietnam ng parehong protesta sa Pilipinas. Lalo na kung ang protestang ito ang tanging paraan para maiparating ng Vietnam ang kanilang pagtutol sa tahasang pambu-bully sa kanila ng Tsina. Kung kaya, marahil ang nararamdaman ng mga Vietnam ay maaaring hindi naman talaga dulot ng anti-Chinese na sentimyento pero dahil sa kawalan ng respeto ng Tsina sa pagiging malayang bansa ng Vietnam.

   

Kung titignan sa punto de bista ng bully at binubully, ang ginagawa ng Tsina ay pambubully sa mga maliliit at mga bansang hindi nila kapantay ng lakas ng hukbong pang-dagat. At sa panig ng Vietnam, lumalabas na ipinagtatanggol lamang nila ang kanilang mga sarili sa pambubully dahil kahit ang mga binubully ay may sariling kalayaan at pagkatao na kailangang kilalanin at respetuhin.

    

Marahil, kapag ito ang pinairal na polisiya at pag-iisip ng gobyerno ng Tsina, hindi ang pagpapadala ng mga barko para itakas ang mga Tsino na nasa Vietnam ang kanilang ginagawa kundi ang iurong ang anumang eksplorasyon na sinimulan na nila sa karagatang inaangkin rin ng Vietnam. At kung ayaw nilang lumaki ang gulong ito at kumalat pa sa ibang lugar tulad ng Pilipinas, marahil dapat rin nilang ikonsidera na itigil na ang paglabag sa mga kasunduang nilagdaan at napagkasunduan na.

Tweet: ang ginagawa ng Tsina ay pambubully sa mga maliliit at mga bansang hindi nila kapantay ng lakas ng hukbong pang-dagat. http://ctt.ec/oS1n1+
Comments