Blog‎ > ‎

Bayanihan Spirit: Tokyo Boy (December 2013)

posted Dec 22, 2013, 11:36 PM by Daloy Kayumanggi

Bayanihan Spirit
by: Mario Rico Florendo

Maliit pa ako noong huli akong nakakita ng bahay na binubuhat para ilipat sa kabilang purok o bahagi ng barangay namin. Magmula noong panahong iyon, akala ko ay sa libro ko lang makikita ang konseptong iyon na itinuro sa akin ng aking mga guro bilang “bayanihan.” Lubos akong namangha at bumilib lalo ng makita ito ng aking dalawang mata. Kung kaya naman, kahit hindi na uso sa atin ang ganitong kaugalian lalo na sa siyudad, binabanggit ko pa rin ang gawaing ito sa tuwing ipinapakilala ko ang mga kaugaliang Pilipino sa mga Hapon at banyaga kong kaklase.

Pagkalipas ng isang dekada, hindi ko na ito napapansin sa aming barangay. Sabi ng ilan patay na raw ang ganitong klaseng kultura sa ating bayan. Hindi mahirap paniwalaan ang ganitong obserbasyon dahil sa panahon ngayon, sino na nga lang ba ang naglilipat bahay bitbit ang bahay nila mismo? Marahil wala na nga. Pero ibig sabihin ba nito patay na rin ang esensiya at aral ng bayanihan na sumesentro sa pagtutulungan at pagdadamayan.

Filipino Community Power

Hindi maitatanggi na isa ang taong 2013 sa isa sa pinakamahirap na taon para sa ating mga Pilipino. Patuloy na sinusubok halos buwan-buwan ang ating katatagan sa gitna ng mga bagyo na tumama sa Luzon, sa lindol sa Bohol at Cebu, at nitong nakaraan lamang, sa super typhoon na sumira ng maraming ari-arian at kumuha ng maraming inosenteng buhay.

Ngunit, hindi rin maitatanggi na isa rin ang taong 2013 sa isa sa mga taon kung saan muling nanumbalik sa ibang anyo ang kaugalian ng “bayanihan” na iniisip na ng marami na patay na. At para patunayan ito, hindi ko na kailangan pang lumayo dahil dito pa lang sa Japan, makikita na ang iba’t ibang gawain para kolektibong matulungan ang ating mga kababayan sa Pilipinas.

Bilang kinatawan ng Association of Filipino Students in Japan (AFSJ), naging prayoridad ng lahat ng miyembro ng grupo ang agarang pagtulong sa mga biktima ng kalamidad hindi lamang sa mga kapwa miyembro namin kundi sa mas marami pa nating kababayan. Sa sama-samang pagtutulungan ng organisasyon para maipaalam sa mga kaklase, propesor at sariling unibersidad ang magagawa ng bawat isa para makatulong, nakaipon na kami ng mahigit Y500,000 sa loob lamang ng isang linggo. Ang maganda pa rito, balak naming ipagpatuloy ang gawaing ito hanggang sa Christmas Party and Charity Event na bukas para sa lahat sa ika-14 ng Disyembre. 

Sa pamumuno naman ng Philippine Assistance Group (PAG), na naka-base sa Kanto area, at pakikipagtulunga ng Embahada ng Pilipinas sa bansang Hapon inilunsad ang iba’t ibang donation drop off centers para sa mga nais magpaabot ng tulong ng in kind. Mahalaga rin ang makokolektang mga tulong mula dito dahil ang mga kagamitang ito ang pinakakailangan ng mga kababayang apektado ng bagyo lalo na sa kanilang pagsisimula ng bagong buhay at kabuhayan.

Sa bahagi naman ng Wakayama, pinangunahan ng Filipino Community in Wakayama ang isang Bingo Charity Event para pa rin sa mga nasalanta ng bagyong Yolanda. Batay sa pahayag ng isa sa mga organizer ng event na si Gene Celle Ferrer, “I just want to express how I appreciate the effort and the sincerity of the people who joined the “bayanihan” today at Wakayama Station. Despite of all our busy schedules, sleepless nights, own personal & work related problems (I know coz I witness some) but still for the sake of our kababayans, we did it!”

Global Bayanihan

Totoo ngang nakakatuwa na ang “bayanihang” ito ay hindi lamang buhay sa aitng mga Pilipino kundi pati na rin sa lahat ng bansa na patuloy na nagpapaabot ng mensahe ng pagdadalamhati at tulong sa ating bansa. Isa sa mga nakakuha ng atensyon ng marami ay ang inorganisang fund-raising ng Pinoy Iskolars in Korea o PIKO dahil nahimok nila ang mga artistang Koreano na mag-perform para sa kanilang event.

Kaugnay rin nito, patuloy pa rin ang pagdating ng lahat ng uri ng donasyon mula sa pinansyal na tulong hanggang sa medical aid, rehabilitasyon at rekonstruksyon ng mga nasirang pasilidad at kabahayan. At para ma-monitor hindi lang ng gobyerno ng Pilipinas kundi ng buong mundo ang ginagawang pagkilos para sa tamang paggamit at paggastos ng mga ito, inilunsad ng gobyerno ang http://www.gov.ph/faith/ kung saan nakatala sa website ang kabuuang foreign aid na natanggap ng bansa.

Marahil totoo ngang wala na ang “lumang bayanihan” ngayon, pero hindi ibig sabihin nito na patay na ang espiritu na kumakatawan sa pagtulong at pakikiramay sa kapwa para      muling makapagsimula ng bagong pamumuhay. Ang “Bagong” Bayanihan Spirit na ipinakita ng mga Pilipino sa buong mundo at kinamanghaan ng lahat ng tao sa buong mundo dahil hindi lamang isang bahay ang sama-sama nating binubuhat sa ngayon, kundi isang bansang handang magsimulang muli.

(Sa lahat ng mga mambabasa ng Tokyo Boy at ng Daloy Kayumanggi, nais ko kayong batiin ng Maligayang Pasko at Manigong Bagong Taon. Maraming salamat sa inyong suporta at makakaasa kayong lalo pa naming pagbubutihin ang aming trabaho na makapagbigay inspirasyon sa lahat ng mga Pilipino dito sa Japan at buong mundo)
Comments