Blog‎ > ‎

Ethics and Advertising

posted Oct 20, 2014, 4:46 AM by Daloy Kayumanggi
Naging matunog sa mga netizens nitong mga nakaraang linggo ang ginawang patalastas ng Aegis Malaysia, isang business process outsourcing company. Ang bidyo na tumatagal ng halos tatlong minuto at in-upload sa youtube, ay pinagkukumpara ang Pilipinas at Malaysia pagdating sa pagnenegosyo. Pero ang kinaalma ng mga nakapanood nito kasama na ang Embahada ng Pilipinas sa Malaysia ay ang hindi etikal na paraan ng pag-promote ng bidyo sa Malaysia bilang lugar kung saan pinakamagandang mag-invest kumpara sa Pilipinas.

   

Binabanggit sa unang bahagi ng bidyo ang ilang mga problema na kinakaharap ng Pilipinas: mahinang seguridad, hindi sapat na imprastraktura, kakulangan ng suporta ng lokal na gobyerno, at panghuli, ang hindi magandang lokasyon ng Pilipinas kaya madalas itong bisitahin ng bagyo at lindol. Sa huling bahagi naman ng bidyo, tila ba binaliktad lang ang mga negatibong katangian ng Pilipinas at sinabing taglay lahat ito ng Malaysia.

   

Maaaring sa punto de bista ng isang realist, totoo at hindi masama ang mensahe ng bidyo. Pero tila ba nakalimutan ata ng kumpanya o ng kanilang PR department ang unang aral sa paggawa ng isang patalastas--hindi mo kailangang manira ng kalaban para lang mapaganda ang imahe ng iyong produkto. Kung gusto mong mapansin ang iyong pino-promote na bagay, dun ka na lamang mag-pokus sa magandang aspekto nito. Pero tila naubusan na sila ng mga ideya at paninira na lamang ang pinakamagandang naisip nila.

   

Bukod pa sa pangit na pagkukumpara na kanilang ginawa, sa pagdaan ng mga katatapos na bagyong Luis at Mario, tila lalong lumalabas ang usapin ng etika ng kanilang patalastas. Tila ba kasalanan nating mga Pilipino na tayo ay naka-posisyon sa Pacific Ring of Fire; na tayo ay binibisita ng mga bagyo ng madalas; na tayo ay nag-eenjoy kapan nakikita natin ang mga kababayan nating nagsu-swimming sa baha.

    

Dahil dito, tama lang ang naging hakbang ng Embahada ng Pilipinas sa Malaysia na sumulat sa kumpanya para pagpaliwanagin sila sa kanilang motibo bakit nila ginawa at inilabas ang patalastas kahit alam nilang makasisira ito ng iba. Sa mundo ngayon ng digital age, mabilis ang pagkalat ng balita at kahit sabihin pang tinanggal na ang bidyo, marami na ang nakapanood at nakuha na nila ang atensyon ng marami.

   

Humingi man sila ng paumanhin at pigilan ang pagkalat ng bidyo sa internet, sabi nga nila, “the harm has been done.” Sa huli, nagtagumpay man na ipaalam ng lahat na ang ginawa ng kumpanya sa kanilang bidyo ay hindi maganda, tila panalo pa rin ang kumpanya dahil sa dagdag na PR na nakuha nila. Oo nga’t luma na pero tila epektibo pa rin: “bad publicity is still publicity."


Daloy Kayumanggi editorial
Comments