Blog‎ > ‎

Maria Christine: Isang Babae, Isang Ina, Isang Inspirasyon

posted Jul 22, 2014, 3:35 AM by Daloy Kayumanggi   [ updated Jul 22, 2014, 11:03 PM ]
Ka-Daloy of the Month

ni: Loreen Dave Calpito


Tampok sa May 25 episode ng palabas na Rated K, produksyong pinagtulungang buuin ng ABS-CBN sa Pilipinas at ng NHK Japan, ang kuwento ng pagkadakila at sakripisyo ng isang ina, si Maria Christine, isang Pinay na nakipagsapalaran sa Japan, mayroong dalawang anak na “Japinoy,” hiwalay sa asawa at ang ating Ka-Daloy of the Month.


Marami ang naantig sa kuwento ni Maria Christine at ng kanyang mga anak. Isa sa kanyang mga anak ay isang sikat na sumo wrestler sa Japan, si Masunoyama Tomoharu.


Mga Unos sa Buhay ni Maria Christine

Sa naturang palabas, ipinakita ang ilang mga pagsubok na dumaan sa buhay ni Maria Christine at ng kanyang mga anak.

   

Dumaan si Maria Christine sa isang “failed relationship,” sa ama ng kanyang dalawang anak. Isa umano sa mga nagpatibay pang lalo kay Maria Christine ay ang kanyang sakripisyo sa pagtataguyod sa dalawang anak, bagamat isang single mother.

   

Sa panayam kay Maria Christine, naisin umano niyang makatapos ang kanyang mga anak sa kolehiyo at pagsilbihin sila hanggang sa sila ay makapag-asawa. Ngunit, dahil sa kanyang estado, bilang “single mother,” mahirap umanong gampanan ang mga iyon, sapagkat pinagsasabay niya ang kanyang responsibilidad sa kanyang mga anak at sa kanyang trabaho. Bagama’t mahirap, patuloy na naitataguyod ni Maria Christine ang kanilang pamumuhay ng kanyang mga anak, bagay na lubos namang ipinagpapasalamat ng kanyang mga anak.


Sa Kasalukuyan

Sa ngayon, bukod sa pag-aalaga sa mga anak, nagta-trabaho rin siya sa isang Day Care Center, nag-aalaga ng mga bata. Isa rin siya sa mga naghahanda ng pagkain sa sumo training center kung saan nag-eensayo para maging mas mahusay na sumo wrestler ang anak na si Masunoyama.


Ang Kanyang mga Anak

itinuturing niyang inspirasyon ang kanyang mga anak. Proud siya na isa sa kanyang mga anak ay pinapalakpakan na ngayon bilang isang sikat at magaling na sumo wrestler sa buong Japan. Isa rin sa kanyang mga anak ay nagtatrabaho, bilang hairdresser ng mga sumo, sa pareho ring training house. Bilib ang dalawang magkapatid sa kanilang ina, sapagkat nakaya niyang palakihin sila nang maayos, bagamat mag-isang nagtataguyod sa kanilang pamumuhay.


Ang “Happy Surprise”

Sa naturang episode ng Rated K, ipinakita ang sorpresang inihanda ng kanyang mga anak, sa pakikipagtulungan ng programang Rated K at ng “Happy Surprise” ng NHK Japan, isang programang nagtatampok sa iba’t ibang taong gustong sorpresahin ang mga taong malapit sa kanilang mga puso.

 

Sa naturang bidyo, sinorpresa si Maria Christine ng kanyang mga anak, sa pamamagitan gn “flash mob dance” sa Sensoji temple sa Asakusa, tampok ang mga sumo wrestlers na sabay-sabay na kumanta’t sumayaw. Ito, ayon kay Masunoyama, ay isang pamamaraan ng kanilang pasasalamat sa kanilang ina sa kanyang pagsisikap na buhayin sila ng kanyang kapatid at sa patuloy na pagsasakripisyo hanggang sa kasalukuyan.

   

Walang duda, isa ngang repleksyon si Maria Christine ng isang Pilipina at inang masikap, matiyaga at matibay, anumang unos ang dumating sa kanyang buhay. Si Maria Christine, isang babae, isang ina, isang inspirasyon sa nakararami.



Comments