Blog‎ > ‎

The Bong Revilla Story

posted Jul 22, 2014, 4:14 AM by Daloy Kayumanggi   [ updated Jul 22, 2014, 5:01 AM ]


ni: Mario Rico Florendo

Tokyo Boy



Naka-roll na ang mga kamera, naka-set-up na ang mga ilaw, naka-cue na ang direktor at nakaabang na ang mga usisero at usisera. Parang normal na tanawin sa shooting ng isang pelikula ni Bong Revilla. Ang pinagkaiba lang ngayon, walang cut, walang editor na magtatagpi-tagpi ng mga pangyayari sa mas maayos na paraan at mas mahalaga, walang direktor na magsasabing cut kapag pangit ang akting.


Nanonood ka man ng balita sa TV, nagbabasa ng mga reaksyon ng tao sa internet, o nakatutok sa paborito mong teleserye, ito ang pinakabagong realiserye (seryeng hango sa realidad) na tiyak tutukan at aabangan ng mga tao.


Nagsimula ito sa Napolist o sa listahan ng sinasabing PDAF mastermind na si Janet Napoles. Pagkatapos masabit ang pangalan ni Bong Revilla, tila awtomatikong umikot ang kamera para sundan ang bawat galaw niya. At isa nga sa mga tinangkilik at pinagkaguluhan na episode ng realiserye ng bayan ay ang music video cum privilege speech dahil sa pagiging kakaiba nito sa lahat ng mga previlege speeches na ginawa sa Senado. At pagkatapos lang ng ilang araw, trending na naman at pumapalo sa ratings ang bagong adiksyon ng bayan.


Suot ang isang puting damit na may nakasulat na verse sa bibliya, paulit-ulit na nanindigan ang Senador na siya ay inosente at biktima lamang daw siya ng pamumulitika. Pati ang miyembro ng kanyang pamilya ay nanindigan na walang kinalaman si Bong sa mga akusasyon sa kanya. Sumangayon rin ang kanyang mga taga-suporta na nagtipon sa compound nila sa Cavite para patotohanan ang kanyang kabaitan at kagandahan ng loob lalo na sa kanyang mga natulungang kababayan. Lahat ng mga eksenang ito, hindi pinalampas ng kamera at tuloy-tuloy na kinunan at brinodcast sa buong Pilipinas.


Tulad ng isang tipikal na teleseryeng Pinoy, hindi tiyak kung kailan ito matatapos--madadagdagan pa ba ng mga karakter, maa-amnesia ba si Bong o isa sa mga taong malalapit sa kanya, may mangyayari bang kidnapan, etc.. Habang hindi tumitigil ang ganitong pag-cover ng media, panonood ng taong-bayan at pag-arte ng mga taong sangkot, patuloy na lumalabo ang pagkakaiba ng isang shooting sa pelikula tungkol sa buhay halimbawa ni Bong Revilla at ng tunay na nangyayari sa kaso ng mga pulitikong inaakusahang nagnakaw ng pera ng bayan.


Ang nakakatakot pa dito, masyado na atang nasanay sa kislap ng showbizness si Bong Revilla kung kaya pati ang Senado ay ginagamit niyang lunsaran para sa kanyang new single, ang coverage niya sa media ang ginagawa niyang pangangampanya para sa pangarap niyang tumakbo bilang presidente, at ang taumbayan at ang Pilipinas ay ginagawa niyang manonood para sa bago niyang realiserye.


Now showing: The Bong Revilla Story.
 
Comments