Blog‎ > ‎

Todai Festival: Ika- 87 na Gogatsusai

posted Jun 21, 2014, 3:09 AM by Daloy Kayumanggi   [ updated Jun 21, 2014, 3:59 AM ]




Tokyo Boy
ni: Mario Rico Florendo


Katulad ng mga masasayang school festival na makikita sa lahat ng eskwelahan dito sa Japan, ang ika-87 na Tokyo University May Festival (東京大学五月祭) ay makulay, maingay at enjoy! Kahit noong hindi pa ako estudyante ng Todai (bansag sa Tokyo University), bumibisita at tumutulong talaga ako sa booth ng mga Pinoy Students na nagbebenta ng iba ibang pagkain at inumin tulad ng empanada, buko pie at coconut juice.

    

Tulad ng mga nakaraang taon, punumpuno ang buong Hongo at Yayoi Campus ng unibersidad ng mga stalls na nagbebenta ng pagkain, inumin at iba ibang klase ng entertainment. Patok rin sa mga manonood ang iba’t ibang performances ng sayaw, kanta at tugtugan gamit ang kakaibang instrumento. Hindi alintana ang mainit na panahon, masayang nagbebenta ng kanilang mga paninda ang mga miyembro ng circle o club para makalikom ng pera para sa kanilang organisasyon. Ang iba naman ay tinitiis ang init ng araw para lamang maipakita ang kanilang mga talento at pinaghirapang performance para sa lahat.


Himawari Project

Ako naman ay may ibang gawain. Mula ng maging estudyante ako ng Todai, ipinangako ko sa sarili na mas lalo akong dapat makibahagi sa kahit anumang gawain na kaya kong gawin. Kaya ngayong taon, pinili kong sumali at tumulong sa Himawari Project na sinimulan ng mga estudyante sa laboratoryo ng isa sa mga propesor ko sa unibersidad na si Prop. Tanaka Akihiko. Ang proyekto ay nilalayong tumulong sa sikolohikal na recovery ng mga biktima ng malakas na lindol at tsunami noong ika-11 ng Marso sa Tohoku region.

    

Ang isang cycle ng proyekto ay nagsisimula sa pagbibigay ng mga buto ng mga sunflower sa mga ordinaryong mamamayan ng Tokyo. Ang mga nakatanggap ng buto ng sunflower ay dapat itanim ito ng dalawa hanggang tatlong linggo at pagkatapos, kailangan itong ibalik sa mga designated na lugar sa Todai para makolekta kasama ng iba pang sunflower na tinanim ng iba. Kapag napagsama na ito, sabay sabay itong ipapadala sa bayan ng Nittori sa rehiyon ng Tohoku kung saan itatanim ito kasama ng mahigit 200 residente ng lugar.

    

Hindi man pisikal na rekonstruksyon o perang donasyon ang binabahagi ng proyekto, sa pamamagitan ng sigla at ganda ng mga sunflower, nilalayon nitong ibalik ang mga ngiti at saya ng bawat apektadong indibidwal ng Nattori-shi sa Tohoku.

    

Sa kabuuan, ang May Festival ng Tokyo University ay nagiging lunsaran hindi lamang para makamit isang mithiin ng isang grupo kundi nagiging lugar rin ito para magtutulung-tulong ang lahat para sa ikatatagumpay ng isang proyekto. Sana sa susunod na taon, sa buwan ng Mayo, makadalaw rin kayo mga ka-Daloy!


Tweet: Todai Festival: Ika- 87 na Gogatsusai #DaloyKayumanggi http://ctt.ec/afOy4+
Comments